ಬೆಂಗಳೂರು : ರಾಜ್ಯದಲ್ಲಿ ಅಹಿಂದ ಸಮುದಾಯಗಳಿಗೆ ಮಂತ್ರಿಮಂಡಲದಲ್ಲಿ ನ್ಯಾಯಸಮ್ಮತ ಪ್ರತಿನಿಧಿತ್ವ ನೀಡುವ ವಿಚಾರದಲ್ಲಿ ಕಾಂಗ್ರೆಸ್ ಹೈಕಮಾಂಡ್ ತುರ್ತಾಗಿ ಗಮನ ಹರಿಸಬೇಕು ಎಂದು ರಾಷ್ಟ್ರೀಯ ಅಹಿಂದ ಸಂಘಟನೆ ಆಗ್ರಹಿಸುತ್ತದೆ.
ರಾಜ್ಯದ ಒಟ್ಟು ಜನಸಂಖ್ಯೆಯಲ್ಲಿ ಸುಮಾರು 75% ರಷ್ಟು ಅಹಿಂದ ಸಮುದಾಯಗಳು — ವಿಶೇಷವಾಗಿ ಹಿಂದುಳಿದ ವರ್ಗಗಳು (OBC) ಮತ್ತು ಅಲ್ಪಸಂಖ್ಯಾತರು — ಪ್ರಮುಖ ಭಾಗವನ್ನು ಹೊಂದಿದ್ದರೂ, ಪ್ರಸ್ತುತ ರಾಜ್ಯ ಸಚಿವ ಸಂಪುಟದಲ್ಲಿ ಸಮರ್ಪಕ ಪ್ರತಿನಿಧಿತ್ವ ದೊರಕಿಲ್ಲ. ಈಗ ಸಚಿವ ಸಂಪುಟ ಪುನರ್ರಚನೆ ನಡೆಯುತ್ತಿರುವ ಹಂತದಲ್ಲಿ, ಕಾಂಗ್ರೆಸ್ ಹೈಕಮಾಂಡ್ ಕನಿಷ್ಠ 25 ಮಂದಿ ಸಚಿವರನ್ನು ಅಹಿಂದ ಸಮುದಾಯಗಳಿಂದ ಅವಕಾಶ ನೀಡಬೇಕು ಎಂದು ನಾವು ಸ್ಪಷ್ಟವಾಗಿ ಒತ್ತಾಯಿಸುತ್ತೇವೆ.
ಇದೇ ರೀತಿಯಲ್ಲಿ ವಿವಿಧ ಮಂಡಳಿ ಹಾಗೂ ನಿಗಮಗಳ ನೇಮಕಾತಿಗಳಲ್ಲಿಯೂ ಅಹಿಂದ ಸಮುದಾಯಗಳ ಪಾಲು ಜನಸಂಖ್ಯೆ ಅನುಪಾತಕ್ಕೆ ತಕ್ಕಂತೆ ಇರಬೇಕು. ಚುನಾವಣೆಯಲ್ಲಿ ಕಾಂಗ್ರೆಸ್ ಪಕ್ಷಕ್ಕೆ ಪ್ರಮುಖ ಬೆಂಬಲ ನೀಡಿರುವ ಅಹಿಂದ ಸಮುದಾಯಗಳು ಅಧಿಕಾರ ಹಂಚಿಕೆಯಲ್ಲಿ ಹಿಂಬದಿಗೆ ತಳ್ಳಲ್ಪಡುವುದು ನ್ಯಾಯಸಮ್ಮತವಲ್ಲ. ಅನುದಾನಗಳ ಹಂಚಿಕೆ ಹಾಗೂ ಅಭಿವೃದ್ಧಿ ಯೋಜನೆಗಳ ಅನುಷ್ಠಾನದಲ್ಲಿಯೂ ಅಹಿಂದ ಸಮುದಾಯಗಳಿಗೆ ಸಮರ್ಪಕ ಪಾಲು ದೊರಕಬೇಕು. ಸಾಮಾಜಿಕ ನ್ಯಾಯದ ತತ್ವಗಳು ಕೇವಲ ಘೋಷಣೆಗಳಲ್ಲಿ ಸೀಮಿತವಾಗದೇ, ಆಡಳಿತದಲ್ಲಿ ಸ್ಪಷ್ಟವಾಗಿ ಪ್ರತಿಫಲಿಸಬೇಕು.
ಕಾಂಷಿರಾಮ್ ಅವರು ಹೇಳಿದಂತೆ — “Vote hamaara, raaj tumhaara – nahi chalega.” ಆದರೆ ಇದೇ ಪರಿಸ್ಥಿತಿ ಇಂದು ಕರ್ನಾಟಕದಲ್ಲಿ ಕಂಡು ಬರುತ್ತಿದೆ ಎಂಬುದು ನೋವುಂಟುಮಾಡುತ್ತದೆ. ಇದಲ್ಲದೆ, ಕಾಂಗ್ರೆಸ್ ಪಕ್ಷದ ವಿವಿಧ ಮುಂಚೂಣಿ ಘಟಕಗಳಲ್ಲಿಯೂ ಎಲ್ಲಾ ಅಧ್ಯಕ್ಷ ಸ್ಥಾನಗಳಲ್ಲಿ ಅಹಿಂದ ವರ್ಗದವರಿಗೆ ಸಮರ್ಪಕ ಅವಕಾಶ ದೊರೆತಿಲ್ಲ. ಇದು ಸಂಘಟನಾ ಮಟ್ಟದಲ್ಲಿಯೂ ಸಮಾನತೆಯ ಕೊರತೆಯನ್ನು ತೋರಿಸುತ್ತದೆ. ಈ ಸಂದೇಶವು ಕೇವಲ ಘೋಷಣೆ ಅಲ್ಲ; ಇದು ಸಮಾನಾಧಿಕಾರದ ಹಕ್ಕಿನ ಘೋಷಣೆ. ಅಹಿಂದ ಸಮುದಾಯಗಳ ಮತದಾರ ಶಕ್ತಿಗೆ ತಕ್ಕ ಪ್ರತಿನಿಧಿತ್ವ ನೀಡದೇ ಇರುವ ರಾಜಕೀಯ ವ್ಯವಸ್ಥೆ ದೀರ್ಘಕಾಲ ಉಳಿಯುವುದಿಲ್ಲ.
ರಾಜ್ಯ ಸರ್ಕಾರ ಹಾಗೂ ಕಾಂಗ್ರೆಸ್ ಹೈಕಮಾಂಡ್ ತಕ್ಷಣವೇ ಜನಸಂಖ್ಯೆ ಅನುಪಾತದ ಆಧಾರದ ಮೇಲೆ ಸಚಿವ ಸ್ಥಾನಗಳು, ಮಂಡಳಿ-ನಿಗಮಗಳ ನೇಮಕಾತಿಗಳು ಹಾಗೂ ಅನುದಾನ ಹಂಚಿಕೆಯಲ್ಲಿ ನ್ಯಾಯ ಒದಗಿಸಬೇಕು ಎಂದು ರಾಷ್ಟ್ರೀಯ ಅಹಿಂದ ಸಂಘಟನೆ ಮತ್ತೊಮ್ಮೆ ಆಗ್ರಹಿಸುತ್ತದೆ. ಮುತ್ತಣ್ಣ ಶಿವಳ್ಳಿ ರಾಷ್ಟ್ರೀಯ ಅಧ್ಯಕ್ಷರು, ರಾಷ್ಟ್ರೀಯ ಅಹಿಂದ ಓ ಬಿ ಸಿ ಸಂಘಟನೆ ಮತ್ತು ರಾಜ್ಯ ಓ ಬಿ ಸಿ ಅಧ್ಯಕ್ಷರು ಮೋಹನ್ ಕುಮಾರ್, ಪದಾಧಿಕಾರಿಗಳು ಭಾಗಿಯಾಗಿದ್ದಾರೆ.